بارزانی مەرجەکانی كورد بۆ بەشداریكردن لە حكومەتی عێراق رادەگەیەنێت

رووداو-هەولێر

سەرۆكی هەرێمی كوردستان لەمیانی پێشوازیکردنی لە نێردەی یەکێتی ئەوروپا، مەرجەکانی کوردی بۆ بەشداریکردن لە حکومەتی داهاتووی عێراق راگەیاند..

بەپێی ماڵپەڕی فەرمی سەرۆكایەتی هەرێمی كوردستان، مەسعود بارزانی لە دیدارێكدا لەگەڵ یانا هایبەسكۆڤا، نێردەو باڵوێزی وڵاتانی یەكێتی ئەوروپا لە عێراق رایگەیاند: "پێویستە لە عێراقدا كورد شەریك بێت و كەس وا بیر نەكاتەوە كە حاكم بێت و خەڵكی دی گوێڕایەڵ و هاووڵاتی پلە دوو بێت، یان بە مەنتقی زۆرینە و كەمینە حوكم بكات".

بارزانی گوتیشی "هەڵبژاردنی 30ـی نیسان دوا دەرفەتە بۆ عێراق ئەگەر بەشێوەیەكی كردەیی پڕەنسیپی شەراكەت جێبەجێ بكرێت ئەوە دەكرێ ئومێدمان هەبێت و پێكەوە بمێنین".

لەبارەی مەرجەکانی هەرێمی كوردستان بۆ بەشداریكردن لە حكومەتی داهاتووی عێراقدا هەیەتی، سەرۆكی هەرێمی كوردستان رایگەیاندووە "پێویستە شەراكەتی حەقیقی بە كردەوە بچەسپێت و دەستوور جێبەجێبكرێت و هەموو خەڵكی عێراق هەست بكەن كە لە ژیانی سیاسیی وڵاتدا بەشدارن".

بارزانی هاوكات جەختی لەوەکردووەتەوە، كە "دەبێ ماددەی 140ـی دەستووریش جێبەجێ بكرێت و سوپای عێراق لەسەر بنەمایەكی نیشتیمانی دابمەزرێتەوە و كێشەی پێشمەرگە چارەسەر بكرێت و یاسای نەوت و غاز پەسەند بكرێت و سەرژمێریی گشتیش ئەنجام بدرێت و ئەو دامەزراوانەی لەدەرەوەی دەستوور دامەزراون هەڵبوەشێنرێنەوە".

سەبارەت بە پۆستی سەرۆك كۆمار و داواكاریی كورد بۆ وەرگرتنی ئەم پۆستە، مەسعود بارزانی ئاماژەی بەوەدا كە "وێڕای تەشریفاتیبوونی پۆستی سەرۆك كۆمار، پاش راگەیاندنی فەرمی ئەنجامەكان و دوای ئەوەی كورد لەوە دڵنیا بێت كە عێراق بۆ دۆخی پێشوو ناگەڕێتەوە، ئەو كات ئێمە پێداگیریی لەسەر وەرگرتنی پۆستی سەرۆك كۆمار دەكەین و بە ئیستحقاقێكی نەتەوەیی هەرێمی كوردستانی دەزانین".